Über d Brügg zum Fescht – syt wiukomme, liebi Gescht!
Unger däm Motto fingt vom 16. bis 20. Mai 2021 z Horbe (Gmein Eggiwil) ds Ämmitalische Schwingfescht statt.
Nid ganz zuefäuig hei mir grad das Motto gwählt, isches doch würklech so, dass nume ganz weni ortsaasässegi Persone nid über ne Brügg müesse, um uf ds Feschtgländ z cho. Di meischte Gescht chöme sicher über d Buebenei- oder über d Horbebrügg. Beid Brügge quere d Ämme. Naheliegend drumm, isch d Ämme o i üsem Feschtlogo. Ds Wasser vor Ämme isch läbig, sprudelnd, schwungvou u geng i Bewegig, grad wie üser starche Manne im Sagmäuring. Ds Wasser vor Ämme cha aber o wiud, ungestüüm u unberächebar sy, genau so, wie mir üs d Schwinger a däm Wuchenänd wünsche. Aber ds Wasser vor Ämme cha o ruehig, friedlech u klar drhärcho. Für Klarheit wärde o üser Kampfrichter sorge.
Jedi Brügg verbindet! A däm Fescht erwarte mir zaurychi Bsuecherinne u Bsuecher, wo der Wäg über d Brügg zu üs finge u sech mit der einzigartige «Schwingerfamilie» verbunge füehle.
Syt aui wiukomme, liebi Gescht!
Flyer mit dem offiziellen Logo für das EMSF 2021.
Hier folgen Dokumente wie Ranglisten etc.
